jesus image
Ilocano Bible

Ti Evangelio ni Lucas 10:30

Bible verse

Ket ni Jesus simmungbat ken kinunana: Maysa a tao simmalog a naggapu iti Jerusalem a napan idiay Jerico, ket natulisan ket sinamsamda ti amin nga adda kencuana ken ginagarada ti sugat ket pinanawanda a nganngani matay.

 Juan 14:6

Ni Jesus cunana kencuana: Siac ti dalan, ken ti pudno ken ti biag: awan ti umay ken Ama, no di magna caniac.

Lucas 18:31-33

Ket ni Jesus, innalana dagiti sangapulo ket dua, ket kinunana cadacuada; Adtoy sumang-attayo sadi Jerusalem, ket matungpalto amin dagiti banag nga insurat dagiti mammadto a maipapan iti Anac ti tao.Ta maiyawatto cadagiti Gentil ket marabrabngisto, ket mauyuyawto, ken matupraan Ket calpasan ti panangsaplitda, papatayendanto; ket iti macaitlo nga aldaw agungarto.:

 

I Juan 1:1

Ti adda nanipud idi ugma, ti nangngegmi, ti nakitami cadagiti matami, dagiti binuybuyami, ken ti naaricap dagiti im-imami, a maipapan iti Sao ti biag.

Aramid 2:14-36

Ngem timmacder ni Pedro agraman cadagidi sangapulo ket maysa, indackelna ti timecna ket nakisao cadacuada; Dacayo lal-laki a Judio ken dacay amin nga agnaed iti Jerusalem, ammoenyo coma daytoy ket imdenganyo dagiti saoc.Ta dagitoy saanda a nabartec, a cas iti panangipagarupyo, ta horas a maicatlo pay laeng iti aldaw;Ngem isu daytoy ti sinao ni mammadto a Joel:Ket maaramidto cadagiti maududi nga aldaw, cuna ti Dios, Ibuyatconto ti Espirituc iti amin a lasag, ket dagiti annacyo lal-laki ken babbai agipadtodanto, ket dagiti babbaroyo macakitadanto cadagiti parparmata, Ket dagiti lal-lacayyo agtagainepdanto ti tagtagainep:Wen, ken cadagiti adipenco a lal-laki ken babbai, cadagita nga aldaw ibuyatconto ti Espirituc, ket agipadtodanto. Ket iparangconto dagiti nacascasdaaw a banag iti langit, ken pagilasinan ditoy daga, dara ken apuy, ken ulep ti asuc:  Ti init agbalinto a sipnget, ket ti bulan agbalinto a dara, casangoanan ti yaay ti dackel ken naisingayan nga aldaw ti Apo. Ket maaramidto a siasinoman nga umawagto iti nagan ti Apo, maisalacanto. 
O lal-laki nga Israelitas: denggenyo dagitoy a sao: Ni Jesus a taga Nazaret, lalaki a pinanecnecan ti Dios cadacayo cadagiti pannacabalin ken nacascasdaaw ken cadagiti pagilasinan nga inaramid ti Dios gapu kencuana iti nagtengngaanyo, a cas ammoyo met; 
Daytoy, nayawat a mayalubog iti natudingan a panggep ken sigud a pannacaammo ti Dios, pinapatayyo ken inlansayo iti cruz gapu cadagiti ima dagiti nadamsac a tattao;
Isu a pinagungar ti Dios, a nacalapsut cadagiti rigat ni patay; gapu ta saan a nabalinan a tenglen ni patay.  Ta cuna ni David a maipapan kencuana: Agnanayon a nakitac ti Apo iti sangoanac: Ta adda iti macanawanco, tapno saanacto a magaraw. Gapuna ti pusoc agracsac, ket agrag-o ti dilac maysa pay ti lasagco agianto ken inanama: Ta dicanto ipalubos nga agtaeng ti cararuac iti Hades, ket dicantto met iyawat ti Santom iti panagrupsa; Impacaammom caniac dagiti dalan ti biag; punoennacto ti ragsac gapu iti caaddaam.  Lal-laki a cacabsat, mabalinco a saoen cadacayo a siwawaya ti maipapan ken amaetayo a David, a natay ken naitanem ket ti tanemna adda cadatayo agingga ita nga aldaw. Idinto ngarud a mammadto, ket siaammo nga incari ti Dios kencuana agraman maysa a sapata, a cadagiti bunga ti tianna, addanto pagtugawenna iti tronona;Isu, idinto a nakitana a sigud, nagsao iti maipapan iti panagungar ni Cristo, a saan met a nabaybayan nga agtaeng idiay Hades, ket ti lasagna saan met a nayawat iti panagrupsa.Daytoy a Jesus pinagungar ti Dios, isu a masacsianmi amin.Iti casta idinto a naitan-oc iti macanawan ti Dios ken inawatna iti Ama ti cari ti Espiritu Santo, imbuyatna daytoy nga makitayo ken mangngegyo. Ta ni David saan nga immuli cadagiti langlangit; ngem isu met laeng cunana; kinuna ti Apo iti Apoc: agtugawca iti macanawanco, Agingga iti mapagbalinco dagiti cabusormo a pagbatayamAmmoen ngarud nga awan duadua ti amin a balay ti Israel, a daytoy Jesus nga inlansayo iti cruz, inaramid ti Dios nga Apo ken Cristo.

Juan 3:1-8

 
Ket adda idi maysa a tao cadagiti Fariseo a managan Nicodemo, panguloen dagiti Judio:
Daytoy immay ken Jesus iti rabii, ket kinunana kencuana: Mannursuro, ammomi a maysaca a mannursuro a naggapu iti Dios; ta awan ti macabalin a mangaramid cadagitoy a pagilasinan nga aramiden, no awan ti Dios kencuana. Simmungbat ni Jesus, ket kinunana kencuana: Pudno, pudno, cunac kenca, no ti maysa a tao saan a mayanac a mabaliwan, saanna a mabalin a kitaen ti pagarian ti Dios. Cuna kencuana ni Nicodemo: Casano ti pannacabalin ti tao a mayanac idinto a lacayen? mabalinna aya ti sumrec manen iti aanacan ni inana, ken mayanac?
Simmungbat ni Jesus: Pudno, pudno, cunac kenca, no ti maysa saan a mayanac iti danum ken iti Espiritu, saanna a mabalin ti sumrec iti pagarian ti Dios. Ti mayanac iti lasag, isu lasag; ket ti mayanac iti Espiritu, isu espiritu. Dica pagsiddaawan a kinunac kenca; Masapul cadacayo ti mayanac a mabaliwan. Ti angin agpuyupuy iti pagayatanna, ket mangngegmo ti awerna: ngem dica ammo no adino ti paggapuanna ken adino ti papananna: casta ti amin a mayanac iti Espiritu.
 

Hebreo 13:5

 
Ti panagbiagyo mayadayu coma iti kinaagum iti pirac; a mapneccayo coma iti adda cadacayo: ta isu met laeng kinunana; Saancanto a panawan, ket dicanto baybay-an.


Juan 14:21

 
Ti addaan cadagiti bilbilinco ket tungpalenna, ida isu dayta ti agayat caniac, ket ti agayat caniac, ayatento ni Amac, ken isu ayatecto, ket agparangacto kencuana.


Apocalipsis 3:20

Adtoy, siac addaac nga agtactacder iti ruangan, ket agtugtugac; no adda dumngegto iti timecco ket luctannanto ti ruangan, sumrecacto kencuana, ket makipanganacto kencuana, ket isu, caniac.

Colosas 1:14

 A kencuana maaddaantayo ti pannacasubbot, ti pannacapawacan dagiti basbasoltayo:
 

Juan 1:12

Ngem cadagiti amin nga immawat kencuana, iniccanna ida ti calintegan nga agbalin nga anac ti Dios cadagidiay a mamati iti naganna:

Juan 5:24

Pudno, pudno, cunac cadacayo: Ti dumngeg iti saoc ket patienna ti nangibaon caniac, adda biagna nga agnanayon; ket saanto nga umay iti pannacaocom, no di ket nanipud ken patay immalis iti biag.

 Juan 10:10

Ti mannanacaw saan nga umay no di tapno agtacaw, ken agpatay, ken agdadael: siac immayac tapno maaddaanda ti biag ken tapno maadanda ti nawadwad unay.

II Taga Corinto 5:17

Gapuna no ti maysa adda ken Cristo, isu baro a parsua: dagiti banag a daan napalabasdan, adtoy nagbalinda a baro.

 I Taga Tesalonica 5:18

Iti isu-amin, agyamancayo; ta daytoy ti nakem ti Dios ken Cristo Jesus ti maipapan cadacayo.

Ti Evangelio ni Juan 15:17

Dagitoy ibilinco cadacayo; Tapno agayan-ayatcayo coma iti maysa ken maysa.

 Dagiti Aramid 17:11

Ket dagitoy natactacnengda ngem dagidi adda idiay Tesalonica, ta inawatda ti sao a nadardaras unay; inaldaw a sinucsukimatda dagiti sursurat, no pudno dagitoy a banag.

 Juan 14:21

Ti addaan cadagiti bilbilinco ket tungpalenna, ida isu dayta ti agayat caniac, ket ti agayat caniac, ayatento ni Amac, ken isu ayatecto, ket agparangacto kencuana.

 Mateo 4:19


Ket cunana cadacuada: Umaycay sumurot caniac, ket pagbalinencayto a dumadaclis cadagiti tao,

Juan 15:8


Daytoy ti pacaidaydayawan ni Amac, nga agbungacayo ti adu, ket agbalincay coma nga adalac.

I Pedro 5:8

Agparbengcayo, agsalucagcayo; ti diablo a cabusoryo, cas la leon a ngumerngernger, magmagna iti sibayyo nga agsapsapul ti alun-unenna

Galacia 5:16 -17

AgparbengcCunac ngarud: magnacayo cas iti Espiritu, ket dicayto tungpalen dagiti tarigagay ti lasag. Ta ti lasag agumanna ti maibusor iti Espiritu, ket ti Espiritu maibusor iti lasag; ta dagitoy agkinnabusor iti maysa ken maysa; iti casta dicay mabalin nga aramiden dagiti banbanag a cayatyo coma.
 

Aramid 1:8

Ngem umawatcayto ti pannacabalin, into umay cadacayo ti Espiritu Santo; ket dacayto ti sacsic sadi Jerusalem, ken iti isu-amin a Judea, ken Samaria, ken agingga iti ungto ti daga.

Colosas 1:27

Isuda a kinayat ti Dios a nangipacaammoan no ania ti kinabacnang ti dayag daytoy a palimed iti tengnga dagiti Gentil, a ti caadda ni Cristo cadacayo isu ti inanama ti gloria:

Lucas 24:11

Ket iti umuna nga aldaw ti lawas, iti agsapa unay napanda iti tanem, nga incuyogda dagiti bangbanglo nga insaganada.Ket nasaracanda ti bato a naligsay idi tanem. Ket simrecda ket saanda a nasaracan ti bagi ni Apo Jesus. Ket naaramid, nga idi addada a silalagaw gapu itoy, adtoy a nagsardeng iti dinnada dagiti dua a lal-laki a nagcawes ti macapurar:Ket gapu ta nagbutengda indumogda dagiti rupada iti daga, ket kinuna dagiti lal-laki cadacuada: Apayapay sapulenyo cadagiti natay ti sibibiag? Awan ditoy, no di ket nagungaren: laglagipenyo ti insaona cadacayo, idi adda pay laeng idiay Galilea. A cuna: Masapul a ti Anac ti tao maiyawat cadagiti ima dagiti tao a managbasol, ken mailansa iti cruz, ken agungar iti maicatlo nga aldaw. Ket nalagipda dagidi saona. Ket nagawidda nanipud iti tanem, ket impadamagda, amin dagitoy cadagiti sangapulo ket maysa ken cadagiti isuamin pay met a sabsabali. Ket da Maria magdalena, ken Juana ken ni Maria nga ina ni Santiago, ken dagiti sabsabali a caduada; sinaoda dagitoy a banag cadagiti apostol. Ket dagitoy a saoda, impapanda nga arapaap ket dida ida pinati.